قوجا تبریز قوجاغین آچیب تهراندان اینجیدیم گئتدیم
من سندن اينجيديم گئتديم...شعر
شاعر میرزه شهرکین "گئتدیم" شعرینی سیزه تقدیم ائدیرم
سوروشما گل نييه دوستوم
تهراندان اينجيديم گئتديم!
جانا گلديم شيرين جاندان
جاناندان اينجيديم گئتديم!
بوندان آرتيق دؤزنمهديم،
درياسيندا اوزنمهديم،
اينجيلرين دوزنمهديم،
عمّاندان اينجيديم گئتديم!
بولود اولوب باخان اولدوم،
دَريلمهديم واغان اولدوم،
تاپدالانميش موغان اولدوم،
جئيراندان اينجيديم گئتديم!
ياد ائيله ديم شهرياردان،
قوي بلله نسين ياخشي يامان،
دئديم دييشيلسين مكان،
مكاندان ايجيديم گئتديم!
حاققا قارشي دورانماديم،
مانع لري وورانماديم،
خانيلان باشارانماديم،
سولطاندان اينجيديم گئتديم.
الكلنميش اَلکايديم،
چرخي دؤنموش فلکايديم،
فيريشتهايديم، ملکايديم،
شئيطاندان اينجيديم گئتديم!
نئيلهميشديم روزگارا،
آتدي دياردان ديارا ،
يارام اوستَن ووردو يارا،
درماندان اينجيديم گئتديم!
يانديم ائله يانمايانا ،
دوز چؤرهيي آنمايانا،
قوربان اولدوم قانمايانا،
قاناندان اينجيديم گئتديم!
قولوما ديرهك تاپانماديم،
چيرپينان اورهك تاپانماديم،
او جور كي گرهك تاپانماديم،
دؤوراندان اينجيديم گئتديم!
رقيبيمي دوست تانيديم،
پوزولماميش بوستانيديم،
يازيلماميش دستانيديم،
عنواندن اينجيديم گئتديم!
گؤز ياشيم كيمسه سيلمهدي،
نامردلر دئيير بيلمهدي
كؤنلومه قوناق گلمهدي،
مهماندان اينجيديم گئتديم!
ياشاييشيم آغير اولدو،
گاهدان چيغير باغير اولدو،
دئمير قيزيم صاغير اولدو،
اوغلاندان اينجيديم گئتديم!
آيريليب بوداغيم قالدي،
انجمنيم، باغيم قالدي،
داشيم دوشدو، داغيم قالدي،
آراندان اينجيديم گئتديم!
بو گئن دونيا رقيبين كي،
مقام سوودا رقيبين كي،
گمي، دريا رقيبين كي،
طوفاندان اينجيديم گئتديم!
ميزده، تختده سنين اولسون،
آينا باختدا سنين اولسون،
پايتاخدا سنين اولسون،
من سندن اينجيديم گئتديم!
اوزاق يئره گئتمه ميشم،
عشقيمي ترك ائتمه ميشم،
چَنده گؤزدن ايتمه ميشم،
دوماندان اينجيديم گئتديم!
دوتدوم آنامين سوراغين،
باجي، قارداش چاي – بولاغين،
تبريز آچميشدي قوجاغين،
هيجرادان اينجيديم گئتديم!
